ليوم واحد فقط ..

[center]ليوم واحد فقط ..

[/center]
النهارده ... بكره ... بعده .... أول ..... النهارده ... ياااااااه إيه ده ، كل يوم زي اللي قبله تفرق بس في التسمية والحروف والترتيب الزمني حتى لو فيه أحداث – بتحدث يعني – مش هيحصل فرق حتى لو أخت علاوة أو حبيت أو اترقيت ، إنت بس اترحلت ترس لقدام في مكنه كبيرة – الدنيا لا مؤاخذة – مش هتفرق معاك ، الفرحه لما بتيجي ما بنزقش عشانها الأيام ، ما بنرحلش الوقت ، والفرحه لما بتيجي ..بترشق .. وسط الزحمة والكآبة ومشاكل الحياة زي إعلان المسلسل العربي ... نفس الوقت والمساحة وبنفس إحساسك بأنها لازم تخلص علي شان نكمل المسلسل الممل .

طب فيها إيه لو نوقف يوم من حياتنا ونعمل زي أم كلثوم و"ما ينحسبش من عمري " ....... يوم واحد .... وقف فيه حياتك ..... مشاكلك مع أهلك ........ صحبتك إلي خنقاك ....... حبيبتك اللي ما بتبطلش غيرة ...ابعد عن التزامات العيال ......وأم العيال ........ وإللي جابوا العيال – حضرتك يعني – ابعد عن التليفزيون و أخباره واطلع علي سطح بيتكو وبص للناس من فوق حتلاقيها بتجري ...... بتجري في الشوارع ......... بين العربيات .... بتجري علي شان تلحق حد أو خايفه من حد ......... بتجري علي شان تلحق وقتها .... شغلها ... امتحاناتها .......وإنت فوق كدا يا معلم هتلاقي الناس صغيره أوي ........ وتايهة وسط طموحاتها اللي ما بتخلصش .

روح مكان ما إنت عايز ........حط نفسك في فردة كاوتش وارميك في البحر ............... سيب التيار ياخدك لأي حتة ......... روح حتة واسعة مفتوحة ......... روح في غيطان بلدك أو صحرا ... يبقى هايل ......... وقف حياتك يوم واحد ..............وقف حياتك علي شان تعيش ......... شايفين الحكمه .... اعمل زي المذيعين .......لما بياخدوا رست بين الفقرات ........ في برامجهم الطويلة المملة اللي كلها رخامة ودكاترة بنضارات .......... اطلع فاصل سريع ، فاصل إعلاني أو أغنيه رومانسية هبلة ..... أو خروجة حلوه ........ أو تمشية في الشارع لوحدك – بلا أصحاب بلا حب بلا قرف .

اقف كده قدام برواز فاضي بتاع المرايا المكسورة مثلا وقول " سأتوقف عن حياتي ليوم واحد ......... أعزائي المشاهدين نعتزر عن هذا العطل الهندسي ......نلتقي بعد الفاصل ".